任天堂Nintendo Switch《集合啦！動物森友會》免費夏季第2彈更新推出已經一星期，相信各位《動森》玩家都已經享受過煙火大會同埋發過個好夢。但係去到下次更新，唔知又要等到幾時先有消息喇。
等得唔耐煩既Fans，可以試下以下介紹既動森手機遊戲《動物森友會—口袋露營廣場》。同樣由任天堂開發既《動物森友會—口袋露營廣場》早係2017年就已經係日本Apps Store上架，至近幾個月動森大熱，又多一眾新玩家加入。而係8月初更正式支援繁體中文語言並係香港Apps Store上架。
喺遊戲入面，每個玩家都有自己既露營地，透過製作唔同既手作、傢具等豐富自己既露營地，同時亦都可以跟據動物朋友唔同既喜好，製作佢地喜愛既手作，完成佢地既願望提升友好度，邀請佢地成為你露營地既常駐客人！
除左露營地之外，玩家需要去到地圖中唔同既地方收集水果、昆蟲、魚類實現同動物朋友既願望，增加友好度，提升角色等級。角色等級提升之後，可以遇到既動物朋友就會更加多，同時仲會獲得葉子票券(Leaf Ticket)同增加物品欄上限。
葉子票券(Leaf Ticket)係遊戲中既課金貨幣。除左提升等級之外，平時遊戲過程亦有機會透過任務以及探險地圖獲得。比較其他手遊，葉子票券(Leaf Ticket)作為課金貨幣獲取難道不大，新手時期特別容易賺取，可以馬上追上遊戲進度，打造你理想既露營地。
相對於Nintendo Switch《集合啦！動物森友會》，《動物森友會—口袋露營廣場》最令吸引玩家既莫過於係每月每星期定期的更新及季節活動，當中亦包含手機遊戲抽獎池既元素，推出唔同主題既幸運餅乾，玩家透過抽取幸運餅乾獲得三至五星不同種類既主題傢具、服裝、飾物等。每款幸運餅乾都有專屬既主題同動物朋友，每一兩個星期就有新一款令人眼前一亮既幸運餅乾。
而季節活動就跟據唔同既季節推出主題活動，例如早前六月推出左六月的新娘有關結婚、婚宴既活動，7月就以夏天大海為主題，以海邊風情小島、海盜、尋寶、雪糕店等連續一個月活動，到左8月份，就以夏天祭典、花火大會、螢火蟲、浴衣、試膽大會既主題串合整個八月。
季節活動一直更新除左令一眾動森愛好者可以享受收集唔同主題物品外，每月既更新都有著濃濃既日本地道文化。令玩家保持新鮮感同時，亦可以感受到日本唔同季節月份既氣氛。對於幾個月無得去日本旅行既大家，都算係望梅止渴。但對部份收集狂玩家黎講，有收集齊呢個遊戲全部鍾意既物品，無論金錢定係努力，相信就要有番唔少既付出喇。